Mbrëmjen e djeshme, pranë “Kullës së Qendresës” në qendër të qytetit të Kukësit, ndodhi një ngjarje e rëndë ku një i mitur 15-vjeçar u plagos rëndë. Incidenti, që ndodhi rreth orës 20:45 të së premtes, dyshohet se u shkaktua nga një përplasje fillimisht verbale, e cila eskaloi në përdorimin e një arme të ftohtë, thikë. Motivet e konfliktit janë ende nën hetim nga autoritetet.

Burime zyrtare bëjnë të ditur se Policia e Kukësit ka vepruar shpejt, duke identifikuar dhe shoqëruar në Komisariat një 15-vjeçar të dyshuar si autorin e plagosjes, si dhe një 14-vjeçar që është përfshirë në konfliktin mes dy të rinjve.

I plagosuri fillimisht u trajtua nga Urgjenca e Kukësit, por për shkak të mungesës së stafit kirurgjikal të specializuar në Spitalin Rajonal të Kukësit, ai u transportua në Spitalin e Prizrenit në Kosovë për trajtim të mëtejshëm. “Në vijim të informacionit paraprak të dhënë për plagosjen me mjet prerës të një 15-vjeçari gjatë një konflikti, të ndodhur në qytetin e Kukësit, ju informojmë se: Falë veprimeve të shpejta, shërbimet e Policisë Kukës, identifikuan dhe shoqëruan në Komisariat për veprime të mëtejshme, një 15-vjeçar që dyshohet si autor, si dhe një 14-vjeçar që është përfshirë në konflikt mes dy 15-vjeçarëve”, thuhet në deklaratën e policisë.

Policia ka gjetur dhe sekuestruar në cilësinë e provës materiale mjetin prerës (thikën) që dyshohet se është përdorur gjatë konfliktit. Hetimet po vazhdojnë në prani të psikologut, Prokurorit dhe familjarëve të të miturve për të sqaruar rrethanat e plota të ngjarjes.