Komisioni i Ankimeve dhe Sanksioneve (KAS) ka caktuar datën 21 gusht për të marrë vendimin mbi fatin e zgjedhjeve për kryetarin e bashkisë së Himarës, të fituara nga kandidati i Partisë Socialiste, Vangjel Tavo. Dy javë pas përfundimit të procesit zgjedhor, KAS do të shqyrtojë ankimin e koalicionit “Bashkë Fitojmë”, i cili kërkon shpalljen të pavlefshme të rezultatit të 4 gushtit.
Trupa e 5 anëtarëve të KAS do të mblidhet për të verifikuar pretendimet e opozitës për parregullsi gjatë zgjedhjeve dhe do të vendosë nëse do të lihet në fuqi fitorja e Vangjel Tavos. Koalicioni opozitar “Bashkë Fitojmë” depozitoi ankimimin më 9 gusht, duke pretenduar se pamundësia e disa qytetarëve për të përdorur mjetet e identifikimit të skaduara shkaktoi parregullsi në procesin e votimit.
Partia Demokratike akuzon mazhorancën për përdorimin e administratës publike për të siguruar fitoren e kandidatit të PS dhe kërkon pavlefshmërinë e rezultatit. Vangjel Tavo, kandidati i PS, mori 1477 vota më shumë se kandidati opozitar Petro Gjikuria. Nëse KAS refuzon kërkesën e “Bashkë Fitojmë”, vendimi përfundimtar do të merret nga Kolegji Zgjedhor, i cili do të jetë hallka e fundit ligjore për zgjidhjen e debatit mbi zgjedhjet në Himarë.
Ndërkohë, kandidati fitues Vangjel Tavo, i cili ka marrë detyrën e kryetarit të bashkisë në mënyrë de fakto, ka deklaruar se po vijon punën në zyrën e tij elektorale dhe është në pritje të vendimit të KAS dhe KQZ. Ai tha se nuk është marrë as gjatë fushatës dhe as pas saj me rivalët e tij, dhe i ka ftuar ata të bëhen pjesë e projektit të tij për Himarën dhe banorët e saj.
“Kam filluar punën. Defakto kam marrë detyrën, dejuro presim vendimarrjen e KAS dhe KQZ. Jam në zyrën time elektorale deri në momentin që do të futem në zyrën e bashkisë. Nuk kam marrë as në fushatë dhe as pas fushatës me ta. Ata gjatë fushatës e kishin kuptuar humbjen e thellë që do të pësonin dhe nisën me deklaratat e tyre për të përgatitur disfatën elektorale. As kam marrë dhe as nuk do të merrem ndonjëherë me rivalët e mi. Përkundrazi, i kam ftuar të bëhen pjesë e projektit tonë për Himarën dhe himariotët,” tha Tavo.
