Një turiste ukrainase mbeti e bllokuar nën disa shkëmbinj në plazhin e Pasqyrave në Sarandë për shkak të dallgëve të forta. Ajo kishte hyrë për të notuar dhe, për shkak të motit të keq, nuk po mundej të kthehej më në breg. Ishte bashkëshorti i saj që njoftoi policinë për ndihmë.

Menjëherë pas marrjes së njoftimit, Shërbimet e Policisë Kufitare dhe Njësia Policore Detare në Sarandë u nisën drejt vendit të ngjarjes. Ata arritën të shpëtonin turisten, e cila kishte mbetur e bllokuar në disa shkëmbinj dhe nuk mund të notonte për të dalë në breg për shkak të dallgëve.

Policia e lokalizoi dhe ndihmoi turisten ukrainase, e cila fatmirësisht ishte në gjendje të mirë shëndetësore. Ajo dhe bashkëshorti i saj falënderuan policinë për reagimin e menjëhershëm dhe profesionalizmin e treguar.

Policia Kufitare u bëri thirrje pushuesve që të jenë të kujdesshëm në kushte të motit të keq dhe të shmangin rreziqet e panevojshme, ndërsa apeluan për vëmendje të veçantë nga drejtuesit e mjeteve lundruese për të garantuar sigurinë e të gjithëve. Në rast nevoje, qytetarët ftohen të telefonojnë në numrin pa pagesë 112 për ndihmë të menjëhershme.