Vrasja e 72-vjeçarit Faik Ajdini në fshatin Zhapokikë, Memaliaj, besohet se lidhet me një konflikt të mëparshëm që viktima ka pasur me një çoban të zonës. Dy muaj më parë, Ajdini kishte pasur një përplasje me çobanin lidhur me kullotën e bagëtive. Pritet që ky konflikt të jetë motivi kryesor për vrasjen.

Faik Ajdini kishte shërbyer si kryeplak i fshatit pranë bashkisë Memaliaj dhe ishte përgjegjës për adresimin e ankesave të bashkëfshatarëve në strukturat policore dhe në bashki. Ai kishte dy ditë që nuk ishte paraqitur në shtëpi, dhe familjarët kishin bërë denoncim në policinë e Memaliaj. Kërkimet nga anëtarët e familjes çuan në gjetjen e tij mëngjesin e sotëm në një përrua që lidhet me lumin Vjosa.

Në vendngjarje, efektivët e policisë konstatuan se Ajdini kishte marrë dy goditje me thikë. Prokuroria e Gjirokastrës ka caktuar një ekspert mjeko-ligjor për të përcaktuar shkakun e saktë të vdekjes dhe është duke hetuar ngjarjen duke marrë në pyetje disa persona, përfshirë çobanin me të cilin Ajdini kishte pasur konflikt. Hetimet janë në vijim për të zbardhur plotësisht këtë ngjarje tragjike.