****

Qytetarët e Kosovës kanë pasur mundësinë të konvertojnë patentë shoferët e tyre të lëshuar nga autoritetet ilegale në ato të Republikës së Kosovës deri sot. Sipas zëvendësdrejtorit të Policisë së Kosovës për rajonin e veriut, Veton Elshani, gjatë ditës së sotme janë bërë 184 kërkesa për konvertim.

Zëvendësdrejtori Elshani ka njoftuar për RTKlive se që nga fillimi i afatit më 10 maj deri sot, janë regjistruar gjithsej 6509 kërkesa për konvertim të patentë shoferëve. Ndërsa ndarja e kërkesave është si më poshtë: në Leposaviq janë bërë 2018 kërkesa, në Mitrovicën Veriore 1576, në Zubin Potok 961, në Zveçan 1177, në Graçanicë 223, në Kamenicë 105, në Shtërpcë 74 dhe në Gjilan 53.

Nga e hëna, më 26 gusht, Policia e Kosovës do të nisë aplikimin e gjobave për ata që do të përdorin patentë shoferë të lëshuar nga Serbia në qytetet e Kosovës. Gjobat për mospasje të patentës së lëshuar nga Kosova do të variojnë nga 500 deri në 1,500 euro. Kjo masë është marrë për të siguruar përputhshmërinë me standardet e Kosovës dhe për të forcuar përdorimin e dokumenteve të vlefshme sipas legjislacionit të vendit.