Një makinë tip “Porsche Cayenne” e vjedhur dhe 24 mijë euro janë sekuestruar në portin e Durrësit. Makina, e cila ishte raportuar e vjedhur dhe shpallur në kërkim nga Interpol Bern, u gjet e fshehur në automjetin e drejtuesit italian me iniciale M.A., i cili tani është proceduar penalisht.
Njoftimi i Policisë
Në vijim të kontrolleve intensive që po kryhen me metoda bashkëkohore në pikën e kalimit kufitar në Portin e Durrësit, me qëllim parandalimin dhe goditjen e paligjshmërive në kufi, shërbimet e Policisë Kufitare kontrolluan në hyrje të Shqipërisë automjetin tip “Porsche Cayenne” me drejtues shtetasin italian M. A.
Nga verifikimet rezultoi se automjeti ishte në kërkim nga Interpol Bern, Zvicër. Gjatë kontrollit të detajuar në automjet, u gjetën të fshehura 24 070 euro, të cilat shtetasi M. A. po përpiqej t’i kalonte në Shqipëri pa i deklaruar në përputhje me ligjin në fuqi.
Specialistët për Hetimin e Krimeve të Drejtorisë Vendore të Policisë Kufitare Durrës referuan materialet në Prokurori. Shtetasi italian M. A., 54 vjeç, është proceduar në gjendje të lirë për akuzat e veprave penale “Trafikimi i mjeteve motorike” dhe “Mosdeklarimi në kufi i të hollave dhe i sendeve me vlerë.”
Gjithashtu, janë sekuestruar në cilësinë e provës materiale automjeti dhe shuma e eurove. Materialet procedurale janë kaluar në Prokurorinë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
