Mbledhja e Këshillit të Legjislacionit është shoqëruar me tensione dhe debate mes socialistëve dhe demokratëve, të cilat janë përqendruar rreth çështjes së mandatit të deputetes Olta Xhaçka. Deputetja Ermonela Felaj dhe deputetja Dhurata Çupi kanë paraqitur pikëpamje të ndryshme mbi mënyrën e trajtimit të kësaj çështjeje dhe procedurën që duhet të ndiqet.

Në diskutimin e saj, deputetja Felaj ka theksuar se Këshilli i Legjislacionit është një organ këshillimor, i cili ka rol në dhënien e mendimeve për vendimet e Gjykatës Kushtetuese (GJK). Sipas saj, është e rëndësishme që ky këshill të japë një mendim të përbashkët dhe të sugjerojë që kryetarja e Kuvendit të përfshijë mocionin në seancën plenare. Ajo ka propozuar që të shmangen vonesat dhe procedurat e ndërlikuara, duke sugjeruar që të përmbyllet procesi dhe të dërgohet mendimi përfundimtar te kryetarja e Kuvendit. Felaj ka nënvizuar se referimi në nenin 14 të rregullores mund të ndihmojë në përshpejtimin e këtij procesi.

Pjesë nga diskutimi:

Felaj: Mendon se mund të jemi më të kursyer në kohë dhe në retorikë. Këshilli për legjislacionit është këshillimor, për të dhënë mendim për vendimin e GJK. Për çështjen në fjalë jemi marrë shumë gjatë. Meqë jemi organ i dhënies së mendimit, të japim mendimin e përbashkët dhe kryetarja e Kuvendit, mocionin me debat ta përfshijë në seancë plenare. Këtë mendim duhet t’i japim kryetares së Kuvendit. Nuk do isha të futeshim në raporte, të mblidhemi dhe njëherë për të miratuar raporte etj etj. Mund ti referohemi nenit 14.

Çupi: Faleminderit zonja Felaj. Në fakt ka vite që kjo godinë dhe godina përballë gjendjen në një rrumpallë dhe kaos legjislativ ku askush nuk respekton atë. Nuk keni pikën e respektit për çfarë thotë Kushtetuta dhe rregullorja. Ka një urdhër të kryetares së Kuvendit që kërkon mbledhjen e Këshillit Legjislativ të Kuvendit për shqyrtimin e vendimit nr 55. Ka një rregullore që ka pikë 1 dhe 4 , por ka dhe pikën 8 për një raport. Nuk mund t’i dalim në dritare dhe të njoftojmë Spiropalin, por duhet një raport me shkrim. Fakti që jemi dakord për një raport, mund t’ia paraqesim kryetares.