Një ngjarje tragjike ka ndodhur në Machelen, Belgjikë, ku një 43-vjeçar shqiptar është vrarë me armë zjarri dhe kushëriri i tij është plagosur rëndë. Viktima është identifikuar si Shpëtim A. Ngjarja e rëndë ndodhi më 25 gusht dhe shpërtheu pas një mosmarrëveshjeje për një vend parkimi.

Sipas mediave vendase, sulmi u krye nga një burrë 61-vjeçar që qëlloi mbi fqinjin e tij 43-vjeçar dhe mbi kushëririn e tij 19-vjeçar. Pas goditjes, Shpëtim A. vdiq nga plagët e marra, ndërsa kushëriri i tij ndodhet në gjendje të rëndë dhe është në rrezik për jetën. Autori i krimit u arratis pas ngjarjes, por u kap më vonë nga policia.

Një dëshmitar ka raportuar se ka parë gruan e viktimës duke qajtur dhe bërtitur, duke pyetur nëse burri i saj po merrte frymë. Fqinjët kanë bërë të ditur se kishte pasur probleme të vazhdueshme mes autorit, një italian, dhe viktimës, një shqiptar. Në momentin e ngjarjes, në shtëpinë e viktimës po zhvillohej një festë ditëlindjeje, dhe dyshohet se konflikti kishte shpërthyer për shkak të bllokimit të një vendi parkimi.