Instituti për Studimet Politike ka publikuar raportin mbi efikasitetin e deputetëve gjatë sesionit parlamentar të periudhës janar-gusht 2024, duke renditur deputetët më pak aktivë në këtë periudhë. Raporti thekson se në krye të kësaj liste qëndrojnë pothuajse të njëjtët deputetë që kanë qenë në krye të listave të ngjashme edhe gjatë sesioneve të mëparshme parlamentare.

Sipas të dhënave të raportit, deputetët më pak efikasë janë Agron Çela i Partisë Socialiste (PS), Gledis Çeliku i Partisë Socialdemokrate (PSD), Gertjan Deda i PSD, Niko Kuri i PS/MEGA, Shkëlqim Bullari i PS, dhe Tatiana Piro e PS. Këta gjashtë deputetë nuk kanë arritur të lënë asnjë “gjurmë parlamentare” gjatë sesionit të fundit parlamentar.

Raporti nënvizon se këta deputetë nuk kanë pasur asnjë angazhim personal në komisionet e Kuvendit dhe as në seancat plenare. Kjo nuk është thjesht një çështje statistikore, ku përmendet fakti se nuk kanë mbajtur asnjë fjalim (0 fjalime), por përfaqëson një problem më të thellë: deputetët nuk kanë iniciuar asnjë nismë, nuk kanë bërë asnjë propozim, dhe nuk kanë marrë pjesë në debatet parlamentare. Në këtë mënyrë, ata nuk kanë përmbushur pjesën më të madhe të detyrimeve të tyre kushtetuese dhe ligjore si përfaqësues të popullit në parlament.

Këto gjetje ngrenë shqetësime të rëndësishme në lidhje me angazhimin dhe përfaqësimin efektiv të deputetëve në Kuvendin e Shqipërisë, duke vënë në pikëpyetje rolin e tyre në procesin legjislativ dhe përgjegjësitë e tyre ndaj zgjedhësve.