Banorët e qytetit të Volosit janë përballur për disa ditë me pamje të frikshme të mijëra peshqve të ngordhur të shpërndarë përgjatë bregdetit të zonës. Ky fenomen i paprecedentë, përveç pamjes shqetësuese dhe erës së rëndë, përbën një rrezik të madh për shëndetin publik, siç theksojnë specialistët, duke u konsideruar si një “bombë shëndetësore”. Problemi po përkeqësohet orë pas ore, ndërsa autoritetet kompetente po përpiqen të menaxhojnë situatën e ndërlikuar.
Shkaku kryesor i kësaj katastrofe mjedisore thuhet të jenë përmbytjet masive që ndodhën disa muaj më parë, të shkaktuara nga dy stuhitë që goditën zonën. Achilleas Beos, kryebashkiaku i Volosit, ka kritikuar ashpër qeverinë për menaxhimin e dobët të kësaj fatkeqësie natyrore. “Qyteti i Volos dhe Gjiri Pagasitikos po përballen me një fatkeqësi ekologjike, por ata që janë përgjegjës për këtë krim mjedisor kanë një emër,” deklaroi Beos.
Sipas ekspertëve, ujërat nga liqeni Karla dhe përrenjtë e zonave përreth, të cilat derdhen çdo ditë në gjirin Pagasitiko, kanë sjellë edhe peshq të ujërave të ëmbla që ngordhin sapo bien në kontakt me ujin e kripur të detit. Këta peshq vijnë nga zonat e përmbytura, ku po zvogëlohet vëllimi i ujit dhe oksigjeni, ndërsa fushat po kullojnë dhe temperaturat rriten.
Vetëm brenda dy ditëve, ekipet e Bashkisë së Volosit kanë mbledhur mbi 57 ton peshq të ngordhur dhe kanë angazhuar edhe 7 anije të vogla për të pastruar të gjithë gjirin. “Që prej ditës së djeshme, shërbimet e bashkisë së Volosit kanë nisur operacionin e pastrimit në frontin bregdetar, plazhet, shkëmbinjtë dhe kudo ku dalin peshq të ngordhur nga deti,” tha Beos.
Për shkak të këtij fenomeni, prokurori ka ndërhyrë për të hetuar cilësinë e ujërave në gjirin Pagasitikos dhe shkaqet e mundshme të ngordhjes së peshqve në plazhet e Magnezisë. Ndërkohë, indinjata po rritet në mesin e bizneseve lokale, të cilat kanë pësuar dëme të mëdha për shkak të ndikimit negativ në turizëm. Kjo zonë, e njohur për bukuritë natyrore, ujërat e pastra dhe infrastrukturën turistike, po përballet me një krizë të paprecedentë që kërkon zgjidhje të menjëhershme.
