Këngëtarja shqiptare me famë botërore, Rita Ora, ka bërë një surprizë të madhe për vizitorët e dyqanit ‘Primark’ në rrugën Oxford të Londrës, duke u bërë për pak kohë arkëtarja e atij dyqani. Me anë të një videoje të publikuar në rrjetet sociale, artistja ka ndarë momentin kur ajo merr një bexh me emrin e saj dhe fillon t’u shërbejë klientëve në arkën e dyqanit.

Në video, Rita Ora shihet mjaft e lumtur dhe tepër energjike teksa përshëndet dhe ndihmon klientët, duke i bërë ata të ndihen të veçantë dhe të befasuar.

“U ndala në dyqanin e Primark në rrugën Oxford për të befasuar blerësit në festimin e përvjetorit të parë të bashkëpunimit tonë! Mbani sytë hapur, shumë më tepër është në rrugë e sipër,” shkruan Rita në përshkrimin e videos.

Ky aktivitet është organizuar në kuadër të promovimit të koleksionit të ri të Ritës në bashkëpunim me ‘Primark’. Koleksioni përfshin një gamë të gjerë veshjesh që janë moderne dhe të përballueshme, të cilat kanë qenë shumë të pritura nga fansat dhe klientët e ‘Primark’. Rita Ora, me këtë veprim, ka arritur të sjellë një notë personale dhe të veçantë në promovimin e koleksionit të saj të ri.