Mbledhja e Këshillit Kombëtar të Partisë Demokratike, e zhvilluar më 6 Shtator 2024, u shoqërua me debate të ashpra. Mbledhja u thirr nga Sali Berisha, i cili aktualisht ndodhet në arrest shtëpie për shkak të hetimeve nga SPAK lidhur me aferën ‘Partizani’.

Gjatë fjalës së tij në video, që u transmetua në sallën e mbledhjes në selinë e PD-së, Berisha sulmoi SPAK duke e cilësuar atë si një institucion që mbështet krimin dhe korrupsionin shqiptar dhe ndërkombëtar. Ai akuzoi SPAK për mbrojtjen e Edi Ramës dhe Erion Veliajt nga ndjekja për vjedhjen e 130 milion eurove vetëm me inceneratorin e Tiranës.

Berisha kërkoi angazhim maksimal nga strukturat e partisë, duke theksuar se këto 9 muaj duhet të përqendrohen vetëm në sulm dhe fitore. Ai paralajmëroi protesta, por nuk dha një datë për nisjen e tyre. Në fjalimin e tij, Berisha kërkoi që PD të përgatitet për aksionin final drejt zgjedhjeve të 2025-s, duke kërkuar takim derë më derë me qytetarët dhe një angazhim të plotë për të arritur fitoren.

“Është koha për të njohur vetëm sulm dhe fitore,” deklaroi Berisha. “Këto 9 muaj, secili nga ne duhet të njohë vetëm sulm, sulm dhe fitore. Ky do të jetë shtatori i fundit në opozitë.”

Debatet në mbledhje, megjithatë, nuk janë ndalur me mesazhet e Berishës. Anëtarët e Këshillit Kombëtar diskutuan ashpër mbi zgjedhjen e drejtuesve të qarqeve dhe primaret në PD, me akuza dhe kundërakuza mes tyre.