Në një postim në Facebook, organizata Qëndresa Qytetare ka ngritur shqetësimin e saj për veprimet e mazhorancës lidhur me moszbatimin e vendimeve të Gjykatës Kushtetuese. Organizata e ka kritikuar këtë institucion, duke e quajtur një “gardiane” të mazhorancës, ndërsa ka akuzuar qeverinë se nuk i respekton vendimet e saj.

Në reagimin e tyre, ata kritikuan vendimin e Kryetares së Kuvendit, Elisa Spiropali, e cila njoftoi pas seancës parlamentare se do t’i drejtohet Komisionit të Venecias për këshillim. Sipas Qëndresës Qytetare, kjo është një taktikë për zvarritjen e procesit dhe për të shmangur zbatimin e vendimeve të Gjykatës Kushtetuese.

Gjykata Kushtetuese u kthye në gardiane të mazhorancës, por mazhoranca nuk zbaton as vendimet e saj!
Dy vitet e fundit Gjykata Kushtetuese në çështje sensitive si menaxhimi i Butrintit, ligji për pengmarrjen e studentëve të mjekësisë, apo pakti Rama Meloni për kampet në Gjadër ka dalë në vendime që ishin në krahun e interesave të qeverisë, por mesa duket qeveria as nuk dënjon ta njohë. Në seancën parlamentare maratonë deputetët e PS nuk zbatuan vendimin e Gjykatës Kushtetuese për dërgimin e mandatit të deputetes socialiste Olta Xhaçka për verifikim, duke abstenuar ose duke votuar kundër.

Kryetarja e Kuvendit, Elisa Spiropali njoftoi në përfundim të seancës se do t’i drejtohet Komisionit të Venecias për mendim, por qartazi kjo është një taktikë për zvarritjen e procesit. Qëndresa Qytetare vlerëson se kjo përbën një precedent të rrezikshëm, pasi forca e kartonëve në kuvend nuk mund të prevalojë mbi ligjin. Qëndresa Qytetare i kërkon Gjykatës Kushtetuese të mbajë një qëndrim publik për këtë rast ku paligjshmëria është konsumuar në zyrat më të larta të Shtetit Shqiptar.”