Deputetja e Partisë Demokratike (PD), Flutura Açka, ka diskutuar mbi situatën aktuale në PD, përplasjet brenda partisë dhe marrëdhëniet me drejtuesit kryesorë të opozitës. Ajo përmendi “tradhtinë” e Lulzim Bashës dhe përplasjen e saj me kreun e grupit parlamentar të PD-së, Gazment Bardhi.
Açka theksoi se pas vendimit të Gjykatës që i kaloi vulën dhe logon e PD-së Sali Berishës, ajo e pranoi këtë si dikush që respekton drejtësinë dhe vendimet e saj. Megjithatë, përplasja e saj me Bardhin erdhi pasi ai e hoqi nga pozita e kryetares së Komisionit të Medias pa e njoftuar paraprakisht. Ajo kritikoi vendimin e tij, duke thënë se nuk kishte marrë asnjë mesazh për këtë ndryshim dhe se ky veprim ishte një goditje ndaj saj dhe parimeve të saj.
“Nuk kam marrë asnjë njoftim, doja të më ishte dërguar qoftë edhe një sms që unë të mos e drejtoja fare Komisionin. Nuk kam qenë pjesë e vendimeve të tyre dhe e projektit të tyre politik,” u shpreh Açka. Ajo gjithashtu theksoi se qëndrimi i saj ishte që parlamenti nuk duhet të përfshihet në konflikte të ashpra, duke shprehur mospëlqimin për disa vendime të tjera të marra nga partia, siç janë flirtet për amnistinë penale dhe listat e mbyllura.
Për më tepër, Açka foli edhe për protestën e opozitës jashtë ambienteve të SPAK në mbrojtje të Sali Berishës, duke e cilësuar këtë si një “autogol” për opozitën.
