Një ngjarje e pazakontë, por me fund të lumtur, ndodhi në Dover, Delaware, SHBA, ku një telefonatë e gabuar habiti punonjësen e ndihmës së shpejtë. Një burrë nga Shqipëria, duke menduar se po kontaktonte policinë në Dover, Angli, për të kërkuar ndihmë për vëllain e tij, i cili ndodhej në rrezik në një gomone që po fundosej në La Mansh, përfundoi duke telefonuar Departamentin e Policisë në Dover, SHBA.

Ngjarja ka ndodhur më 27 gusht, kur shqiptari bëri një kërkim në internet për “Departamentin e Policisë së Doverit” dhe si rezultat, gjeti kontaktet e policisë në Delaware, SHBA. “Ai mendoi se po telefononte policinë në Dover, Angli, por përfundoi duke folur me agjencinë tonë në Shtetet e Bashkuara,” shpjeguan zyrtarët e policisë në një njoftim për shtyp.

Megjithatë, falë bashkëpunimit të shpejtë mes agjencive ndërkombëtare, brenda vetëm katër minutash u njoftua Roja Bregdetare Franceze. Në fund, shqiptari arriti të kontaktonte me ekipet franceze të shpëtimit, dhe vëllai i tij, së bashku me të tjerët në gomone, u shpëtuan në kohë.