Bashkimi Evropian ka vendosur të vërë në dispozicion një fond prej 10 miliardë eurosh për të mbështetur vendet anëtare të prekura nga përmbytjet e rënda të shkaktuara nga stuhia Boris. Presidentja e Komisionit Evropian, Ursula von der Leyen, gjatë një vizite në qytetin polak Vroclov, njoftoi se këto fonde do të përdoren si një reagim urgjent për të ndihmuar në rindërtimin dhe lehtësimin e dëmeve të shkaktuara nga përmbytjet.

“Ne mund të vëmë fillimisht 10 miliardë euro në dispozicion nga fondet e kohezionit për vendet e prekura. Ky është reagimi ynë i menjëhershëm,” deklaroi von der Leyen. Gjatë takimit me liderët e katër vendeve të goditura nga përmbytjet, ajo u shpreh e prekur nga përmasat shkatërruese të përmbytjeve, duke thënë se pamjet nga rajonet e dëmtuara i kishin “thyer zemrën”.

Gjermania ofron ndihmë ushtarake Polonisë

Ndërkohë, Gjermania ka ofruar ndihmë konkrete për Poloninë, e cila është një nga vendet më të prekura nga përmbytjet, veçanërisht në rajonet jugperëndimore. Ministria e Mbrojtjes e Gjermanisë njoftoi se kryeministri polak, Donald Tusk, ka pranuar ndihmën gjermane, e cila përfshin dërgimin e ushtarëve për të ndihmuar në zonat e dëmtuara.

Tusk bëri thirrje për qetësi dhe mirëkuptim nga qytetarët polakë, duke i kujtuar se ushtarët gjermanë janë atje për ndihmë. Duke iu referuar ndjenjave anti-gjermane që rrjedhin nga historia e pushtimit nazist të Polonisë gjatë Luftës së Dytë Botërore, ai u shpreh: “Nëse shihni ushtarë gjermanë, ju lutem mos u frikësoni. Ata vijnë për të ndihmuar, mos kini dyshime.”

Polonia, e cila ka dërguar tashmë rreth 16,000 ushtarë për të ndihmuar në përballimin e krizës, po përballet me dëme të mëdha nga përmbytjet dhe ndihma ndërkombëtare është thelbësore për përballimin e situatës.