Aktorja Olta Gixhari, e ftuar në podcastin e Mira Kazhanit, ndau përvojën e saj lidhur me pjesëmarrjen në “Big Brother VIP Albania” dhe reagimet që mori nga publiku. Ajo pranoi se shumë njerëz e kanë urryer gjatë kohës që ishte pjesë e spektaklit, por pas daljes, disa prej tyre i kanë kërkuar falje për keqkuptimet.
“Nuk më gjykuan, më urryen,” tha Olta, duke shtuar se familja e saj e përjetoi keq këtë periudhë. “Turma ka gjykuar edhe Krishtin, e ka kryqëzuar. Unë nuk dua ta krahasoj veten me Krishtin, por ishte një pozicion shumë i vështirë. Nuk kërkoj që të më duan të gjithë, dhe nuk më shqetëson fare. Ata që më duan, më duan fort. Ka njerëz që më kanë kërkuar ndjesë, duke thënë se nuk të kemi kuptuar.”
Kur u pyet pse vendosi të marrë pjesë në “Big Brother VIP Albania”, Olta shpjegoi se kishte një nevojë të brendshme për të bërë diçka ndryshe. “Është një emision që kurrë nuk do thoja po. Unë jam njeri që mezi bën një intervistë, e jo më të shfaqem në një reality show. Por ishte një periudhë e çuditshme. U bëra nënë me plan dhe hoqa dorë nga gjithçka – nga teatri dhe bizneset e mia. Isha në Spanjë, me një bebe që qante pa pushim, dhe po shkalloja. Kisha nevojë për një revolucion, një shkëputje.”
Gixhari shtoi se përvoja në “Big Brother VIP” ishte një ulërimë nga thellësia e shpirtit, për të dalë nga rutina dhe për të përballuar sfidat e jetës së re si nënë. Edhe pse bashkëshorti i saj Dori në fillim nuk ishte dakord, ajo mori mbështetjen e tij për të marrë pjesë. “Nuk jam pishman, dhe nëse do të kthehesha prapë, do të bëja të njëjtën gjë,” përfundoi ajo.
