Policia e Tiranës ka dhënë një njoftim të ri lidhur me ngjarjen e ndodhur pesë ditë më parë në një market në “Rrugën e Barrikadave”, ku një vajzë 2-vjeçare u tentua të rrëmbehej nga një grua. Pamjet e incidentit, që u bënë virale në rrjetet sociale, tregojnë gruan duke marrë në duar vajzën, për t’u rikthyer sërish në market pas pak minutash.

Policia ka bërë të ditur se ka identifikuar dhe shoqëruar 57-vjeçaren R. B., e cila dyshohet se ka probleme të shëndetit mendor. Në njoftimin e saj, policia thekson se shërbimet e Komisariatit të Policisë Nr. 3 kanë vepruar menjëherë pas ngjarjes.

“Pas njoftimit të dhënë më datë 15.09.2024, ne ju njoftojmë se kemi identifikuar dhe shoqëruar në ambientet e Policisë shtetasen R. B., 57 vjeçe, banuese në Tiranë, e cila dyshohet se vuan nga probleme të shëndetit mendor,” thuhet në njoftim.

Prokuroria e kryeqytetit ka nisur procedimin në gjendje të lirë për 57-vjeçaren, duke e akuzuar për veprën penale “Heqja e paligjshme e lirisë”, mbetur në tentativë.