Deputeti i Partisë Demokratike, Ervin Salianji, shprehu besimin se do të shpallet i pafajshëm, duke theksuar se nuk ka kryer asnjë krim. Në një intervistë, ai u pyet nëse ndjente frikë nga një dënim, duke u përgjigjur se e vetmja frikë që ka është nga Zoti. Ai theksoi se denoncimet e tij janë për interesin publik dhe jo për arsye personale.

“Unë pres pafajësi dhe të mbyllet kjo çështje. Nuk kam kryer asnjë vepër penale,” tha Salianji. Ai komentoi mbi përdorimin politik të denoncimeve, duke sugjeruar se ka pasur përpjekje për të heshtur zërat e opozitës.

Sipas tij, ka një përpjekje për të frenuar denoncimet nga funksionarët e opozitës, duke pyetur se cili është krimi i tij, përveç se ka denoncuar një trafikant droge, i cili, siç tha ai, u arrestua dhe shkoi në burg me këmbët e veta pas denoncimit.