Deri më tani, 215 të rinj dhe të reja kanë aplikuar përmes platformës “Deputeti që Duam”, një nismë e Partisë Socialiste për të përzgjedhur kandidatë të rinj për zgjedhjet parlamentare të vitit 2025. Këto të dhëna u bënë publike nga Kryeministri Edi Rama në një postim në rrjetet sociale.

Aplikimet vijnë në kuadër të ndryshimeve të reja në Kodin Zgjedhor, sipas të cilave në zgjedhjet e ardhshme do të përdoret një sistem me lista të mbyllura dhe të hapura. Konkretisht, 1/3 e listës do të jetë e mbyllur, duke garantuar vende për disa kandidatë, ndërsa 2/3 e listës do të jetë e hapur, ku votuesit do të kenë mundësi të zgjedhin preferencat e tyre.

Kryetari i Partisë Socialiste, Edi Rama, ka theksuar se deputetët aktualë do të garojnë në listat e hapura, ndërsa kandidatët e rinj dhe ata me vetëm një mandat do të kenë një vend të sigurt në listat e mbyllura. Kjo është pjesë e strategjisë së re të PS-së për të integruar figura të reja në skenën politike dhe për të përgatitur ekipin për zgjedhjet e ardhshme.