Ish-kryeministri Sali Berisha ka reaguar ashpër pas deklaratave të kryeministrit Edi Rama për krijimin e një shteti bektashi në Tiranë, duke bërë thirrje për kujdes ndaj kësaj lëvizjeje. Gjatë një fjalimi para mbështetësve të tij, Berisha e cilësoi këtë iniciativë si një hap për të maskuar lidhjet e Ramës me krimin, si dhe vjedhjet e mëdha që kanë ndodhur në Shqipëri.
“Vendosi si maskë kaukën e shenjtë të Bektashiut, në të cilën fle shpirti i Baba Aliut,” tha Berisha, duke nënkuptuar se Rama po përdor këtë lëvizje për qëllime personale dhe për të shpërqendruar vëmendjen nga problemet e tjera të vendit.
Ish-kryeministri theksoi se ky shtet nuk do të jetë në shërbim të besimtarëve bektashinj, por për përfitime personale të Ramës. “Me këtë rast, garantoj miqtë e mi bektashinj kudo që janë, se nuk e ka për ata, por e ka për veten e tij, prandaj kujdes. E ka për sulltanatin e Surrelit,” tha Berisha.
Ai vazhdoi të denoncojë regjimin që, sipas tij, e trajton Shqipërinë si një pushtues të egër dhe armik të vlerave themelore të shoqërisë. Në përfundim, Berisha kërkoi që qytetarët të jenë të vetëdijshëm për manipulimet dhe mashtrimet që po ndodhin në vend.
Pjesë nga fjala e Berishës
Mirëmbrëma dhe përshëndetjet më të përzemërta.
Mirënjohjen më të thellë, për ju qëndrestare dhe qëndrestarë të pamposhtur, misionare dhe misionarë të kauzës së dejtë të shqiptarëve.
Një përshëndetje të përzemërt oratorëve të parlamentit të fjalës së lirë, të cilët përcjellin çdo natë të vërtetat tek shqiptarët, denoncojnë dhe demaskojnë regjimin e narkoshtetit që sillet me Shqipërinë e shqiptarët si një pushtues i egër, si një armik i egër i vlerave themelore të një shoqërie të lirë, votës së lirë, shtetit ligjor.
Të dashur miq!
Edi Rama këto kohë për të mundur të maskojë lidhjet e tij të tmerrshme me krimin, për të maskuar vjedhjet e mëdha të shqiptarëve, për të maskuar zbrazjen e Shqipërisë, vendosi si maskë kaukën e shenjtë të Bektashiut, në të cilën fle shpirti i Baba Aliut.
Me këtë rast garantoj miqtë e mi bektashinj kudo që janë, se nuk e ka për ata, por e ka për veten e tij, prandaj kujdes. E ka për sulltanatin e Surrelit.
E ka të largojë mendjen e qytetarëve nga të zezat që shpërthejnë çdo ditë në këtë vend, nga mashtrimet, nga qëndrimet anti shqiptare.
