Autoritetet greke kanë gjetur 25 persona, të cilët besohet se janë emigrantët e zhdukur nga mbytja e varkës në Egje, ngjarje në të cilën u raportua për të paktën 3 viktima. Shtetasit e gjetur janë nga Siria, Palestina dhe Kuvajti.

Sipas mediave vendase, mes tyre ndodhet edhe një grua shtatzënë, e cila u evakuua për të marrë ndihmën e parë në qendrën shëndetësore të Karlovassos.

Nuk është ende e qartë nëse emigrantët e gjetur në Drakaeans kanë lidhje me anijen e mbytur në Agios Isidoros, apo nëse ky është një incident tjetër. Autoritetet vazhdojnë hetimet për të zbardhur rrethanat e gjetjes së këtyre personave në zonë.

Mëngjesin e së hënës, roja bregdetare lokalizoi dhe kërkoi ndihmë për të shpëtuar varkën që po mbytej, në të cilën ndodheshin fillimisht 33 persona. Nga ky numër, 5 persona u gjetën në breg, ndërsa 3 të tjerë u gjetën pa shenja jete.