Sipas kërkesës së familjarëve të viktimës Egli Proga, sot është marrë vendimi për të ndryshuar prokuroren që merrej me hetimin e çështjes së 42-vjeçarit. Pas largimit të prokurores Vasjana Postoli, çështja i është dorëzuar drejtueses së Prokurorisë së Korçës, prokurores Dhorina Theodhori.

Prokurorja Postoli kishte ndryshuar akuzën ndaj të dyshuarit Denis Meçe nga “vrasje me dashje” në “vrasje nga pakujdesia”. Aktualisht, Meçe ndodhet në burg për vrasjen e Egli Progës, ndërsa tre persona të tjerë, Leonidha Guçe, Arjan Manellari dhe Voltan Shkulaku, janë liruar me masën “detyrim paraqitjeje” për akuzën e “moskallëzimit të krimit”.

Ngjarja që çoi në vdekjen e Egli Progës ndodhi pas një sulmi fizik të kryer nga 29-vjeçari Denis Meçe, ku dëmtimet fatale i shkaktuan viktimës vdekjen. Ndërkohë që Meçe ndodhet i arrestuar, hetimet vijojnë për të sqaruar rrethanat e plota të ngjarjes, për të cilën ka dyshime se mund të jetë tentuar të fshihet nga autoritetet.

Personat e tjerë të përfshirë, Voltan Shkulaku, Leonidha Guçe dhe Arjan Manellari, janë akuzuar për “moskallëzim krimi” dhe për veprime që kanë penguar zbardhjen e së vërtetës, pasi kanë qenë të pranishëm gjatë ngjarjes, por nuk e kanë raportuar krimin.