Vlora vazhdon të mbetet një prej destinacioneve më të njohura në Shqipëri, duke përjetuar një transformim të dukshëm në turizëm.

Pamjet e ardhura sot nga operatori turistik TripMe.Today janë fantastike dhe pse kushtet e motit skanë qënë të qëndrueshme.

Ky qytet bregdetar tashmë nuk është më vetëm një atraksion sezonal i verës, por ka filluar të tërheqë turistë gjatë gjithë vitit, veçanërisht në muajin shtator. Pamjet e fundit të sjella nga operatorët turistikë tregojnë një prani të konsiderueshme të vizitorëve me kombësi të ndryshme, që e konsiderojnë këtë periudhë si kohën ideale për pushime.

Pas një kohe me mot të paqëndrueshëm dhe reshje shiu, fundjava e ndritur nga dielli ka rikthyer pushuesit në plazhet e Vlorës. Kryesisht turistët e huaj nga vende si Franca, Italia, Çekia, Holanda, dhe madje edhe nga Argjentina, po shijojnë brigjet e qeta të qytetit. Ata theksojnë se temperaturat më të buta dhe largimi i turmave të mëdha e bëjnë shtatorin një muaj ideal për të kaluar pushimet.

Rritja e interesit për Vlorën në këtë periudhë reflekton një trend të zgjeruar turistik, me një numër të lartë vizitorësh që vazhdojnë të vijnë edhe përtej muajve të verës. Ky ndryshim sinjalizon se Vlora është bërë një destinacion i qëndrueshëm për turizmin gjatë gjithë vitit, duke ofruar një përvojë të veçantë për pushuesit, edhe në ditët e fundit të verës.