Presidenti i Asamblesë Supreme të Islamistëve të Serbisë dhe muftiu i Beogradit, Muhamed Jusufspahic, ka reaguar ashpër ndaj planeve të kryeministrit shqiptar, Edi Rama, për të themeluar një shtet sovran bektashi në zemër të Tiranës. Jusufspahic, i cili aktualisht mban postin e ambasadorit të Serbisë në Arabinë Saudite, shprehet se bektashinjtë nuk mund të konsiderohen myslimanë dhe shton se mënyra e tyre e jetesës dëshmon këtë diferencë. Sipas tij, bektashinjtë janë një sekt që ka origjinën në Turqinë e shekullit të 14-të dhe besojnë në Aliun, kushëririn e Profetit Muhamed.

Në komentet e tij, muftiu shprehet se nuk e di numrin e saktë të bektashinjve, por beson se në rajon ata përbëjnë një grup prej më shumë se një milion njerëzish. Ai mendon se veprimet e Ramës janë pjesë e një strategjie për të forcuar “pan-shqiptarizmin”. Jusufspahic thekson se nuk pret që ndonjë shtet të njohë këtë entitet të ri, por paralajmëron se “gjithçka mund të ndodhë“, sidomos në një periudhë kur vendet arabe po tregojnë më shumë mbështetje për myslimanët, duke marrë parasysh situatën e vështirë të palestinezëve në Gaza.

Muftiu Jusufspahic është i njohur për deklaratat e tij të diskutueshme, dhe më herët ka shprehur se “Kosova është djepi i Serbisë” dhe se “serbët nuk janë një shtet gjenocidial“. Këto deklarata e kanë pozicionuar atë si një zë që nxit debate në lidhje me çështjet fetare dhe kombëtare në rajon.