Një nënë e pesë fëmijëve, Alice Webb, ka humbur jetën këtë javë në Angli pas një ndërhyrjeje estetike “jo-kirurgjike” në të pasme, e njohur si procedura ‘liquid Brazilian’. Zyrtarët britanikë kanë deklaruar se kjo është hera e parë që një person humb jetën në Britani nga kjo procedurë, megjithëse shkaqet e sakta të vdekjes ende nuk janë publikuar. Në lidhje me rastin, dy mjekë janë arrestuar nën akuzën e vrasjes nga pakujdesia.

34-vjeçarja ndërroi jetë mesnatën e së hënës në një spital të Gloucestershire, pasi u ankua për shqetësime dhe gjendje të rënduar shëndetësore. Bashkëshorti i saj ka reaguar publikisht për humbjen tragjike në rrjetet sociale, duke theksuar gjendjen e rënduar emocionale të familjes dhe fëmijëve të tyre.

“Fëmijët janë shumë të dobët tani! Alice na la mesnatën e djeshme. Dy njerëz janë arrestuar për vrasje nga pakujdesia,” shkroi ai në Facebook.

Raportimet tregojnë se procedura për të cilën Alice kishte vendosur konsistonte në injektimin e mbushësve dhe “acidit hialuronik” në të pasme për të rritur volumin e tyre. Alice Webb, e cila punonte si estetiste në një klinikë të quajtur Crystal Clear në Gloucestershire, nuk ia doli të mbijetojë pas komplikacioneve të kësaj ndërhyrjeje.

Në ndërkohë, një mikeshë e të ndjerës ka hapur një fushatë për mbledhje fondesh bamirësie për të ndihmuar familjen. Ajo e përshkroi Alice-n si një person të bukur, me zemrën më të madhe dhe plot mirësi, duke nënvizuar humbjen e madhe për komunitetin dhe familjen e saj.

Policia britanike ka konfirmuar arrestimin e dy personave të dyshuar për vrasje nga pakujdesia dhe po vijon hetimet për zbardhjen e plotë të ngjarjes.