Pas vendimit të Gjykatës së Apelit që la në fuqi dënimin me 1 vit burg të Gjykatës së Shkallës së Parë, deputeti i PD-së, Ervin Salianji, ka reaguar ashpër për mediat, duke e cilësuar vendimin si politik.

Në fjalën e tij, Salianji deklaroi: “Siç edhe besoj e ndoqët në seancë, gjykata kishte ardhur me një vendim të parapërgatitur. Në të gjithë elementët e një dosje të kopsitur nga fillimi deri në fund, kjo vendimmarrje është e qartë se është politike, një dënim politik, i pari pas 32 vitesh për agjitacion dhe propagandë.”

Ai theksoi se nuk ka bërë betejë për interesa personale, por ka vepruar gjithmonë në interes të publikut: “Kam bërë shërbim të madh për interesin publik në çdo formë dhe mënyrë. Nuk kam bërë betejë për veten, për të vjedhur, për të vrarë apo për trafik droge, por kam luftuar kundër trafikantëve të drogës dhe kundër atyre që kanë shkatërruar këtë vend.“