Një aksident i rëndë është regjistruar sot në Pukë, ku një 34-vjeçar me inicialet G.K. ka humbur jetën. Familjarët e viktimës, banues në fshatin Berishë Vendi, njoftuan Policinë mëngjesin e sotëm për humbjen e kontakteve me të riun që prej mbrëmjes së 28 shtatorit.

Sipas informacioneve, 34-vjeçari kishte shkuar në fshatin Iballë dhe kishte njoftuar familjen se do të kthehej në banesë atë mbrëmje. Pas një kontrolli të nisur sot paradite, në zonën e quajtur “Laku i Qershisë”, në një rrugë dytësore që të çon në lagjen Bullicë të fshatit Berishë Vendi, automjeti i tij u gjet rreth 50 metra poshtë rrugës, me trupin e pajetë të të riut brenda.

Dyshohet se shkak i aksidentit ka qenë humbja e kontrollit të automjetit për shkak të motit të keq, gjë që e ka bërë të dalë nga rruga. Pamjet e publikuara tregojnë automjetin tërësisht të shkatërruar, duke bërë që shanset për mbijetesë të ishin shumë të vogla.

Policia po heton ngjarjen për të përcaktuar me saktësi rrethanat e aksidentit.