Më 15 tetor, Shqipëria pritet të hapë kapitujt e parë të integrimit në një konferencë të dytë ndërqeveritare me Bashkimin Evropian, duke nisur kështu një rrugëtim të ri, e ndarë nga Maqedonia e Veriut në këtë proces. Para kësaj ngjarjeje, qeveria shqiptare duhet të dorëzojë në Bruksel pozicionin e saj negociues më 2 tetor. Ndërkohë, në kuadër të këtyre zhvillimeve, nesër do të zhvillohet një mbledhje e Komisionit për Çështjet Europiane, që drejtohet nga Partia Demokratike.

Në lidhje me këtë mbledhje, kryetarja e Komisionit, Jorida Tabaku, shpjegoi situatën gjatë një interviste televizive, duke u shprehur se, përkundër spekulimeve, ligjvënësit e PD nuk do të bojkotojnë punimet e Komisionit. Ajo konfirmoi se do të jenë të pranishëm në mbledhje dhe do të mbështesin procesin e integrimit të vendit në BE.

“Mbledhja ka një datë të caktuar, e cila ende nuk është njoftuar zyrtarisht nga qeveria. Ky është një proces që, në pjesën më të madhe, nuk është publik. Megjithatë, nesër përfaqësuesit e opozitës do të jenë të pranishëm në mbledhjen e Komisionit të Çështjeve Europiane si një shenjë e mbështetjes së këtij procesi. Natyrisht, ne do të shprehim të gjitha shqetësimet tona, sepse, në fund të ditës, procesi i integrimit nuk është vetëm një çështje politike. Nuk është një proces elitar ku ne thjesht plotësojmë disa letra dhe shkruajmë disa raporte. Ky është një proces që kërkon ndryshime të vërteta. Besojmë se këto ndryshime duhet të ndodhin, duke marrë parasysh tranzicionin e gjatë që ka kaluar Shqipëria, nga i cili ende nuk ka dalë. Nuk jam unë që do të vazhdoj mbledhjet e Komisionit. Është vendosur që PD të marrë pjesë aktivisht. PD ka vendosur që nesër përfaqësuesit e saj të jenë të pranishëm atje,” tha Tabaku.