Kreu i Partisë Demokratike, Sali Berisha, mori pjesë sot në mbledhjen e Këshillit Kombëtar të PD-së përmes një video-lidhje, ku theksoi guximin e deputetit Ervin Salianji në mbrojtjen e të vërtetës. Berisha e përshkroi Salianjin si një të ri guximtar që, në mes të vërtetës dhe përuljes ndaj kriminelëve në pushtet, zgjodhi të mbrojë interesin e qytetarëve shqiptarë.

Ai shprehu shqetësimin se deputetët e opozitës burgosen për denoncimin e krimit të organizuar dhe ngriti pyetjen se kush do t’i mbrojë qytetarët nga ky rrezik. Berisha kritikoi qeverinë e Edi Ramës, duke thënë se ajo ka vendosur një model të vjedhjes 100% të fondeve dhe se drejtësia është bërë një me krimin.

“Kur deputetët e opozitës burgosen se denoncojnë krimin e organizuar, kush do i mbrojë qytetarët? A do ju mbrojë qeveria e Edi Ramës, presidenti, apo drejtësia që është sot njësh me krimin?” – tha Berisha, duke akuzuar Ramën për lidhje me krimin dhe për të mos u përballur me vjedhjet e tij.

Ai theksoi se shqiptarët sot kanë kundër tyre një qeveri, një president, dhe një drejtësi që janë të gjitha instrumente të mobokracisë dhe diktaturës, duke i krahasuar këto pushtete me ato të regjimit komunist. Berisha e përshkroi Ramën si një “narkodiktator” që ndjek manualet e narkodiktaturave.

Në përfundim, ai i bëri thirrje çdo shqiptari dhe anëtari të PD-së të reflektojë mbi të ardhmen e vendit: “A do lejojmë ne që të dorëzojmë fatin tonë, fatin e fëmijëve tanë, fatin e demokracisë, një narkodiktatori si Edi Rama?”