Një shqiptar 29-vjeçar, Eduart Cili, është dënuar me 24 muaj burg në Angli për kultivim kanabisi në një banesë. Ngjarja ndodhi pasditen e 21 korrikut të këtij viti, kur policia britanike shkoi në vendndodhjen e tij. Cili i lejoi oficerët të futeshin në banesë dhe pranoi përgjegjësinë, duke deklaruar se “unë e bëra, gruaja ime nuk di asgjë për këtë.” Kjo deklaratë çoi në arrestimin e tij si i dyshuar për kultivim të kanabisit.

Në banesën e tij u gjetën 269 bimë kanabis me vlerë deri në 90,000 £, të kultivuara në një papafingo të pajisur me të gjitha mjetet e nevojshme për prodhimin dhe rritjen e bimëve. Cili u akuzua për prodhimin e drogës së kontrolluar të klasit B – kanabis – dhe më 23 korrik u paraqit në Gjykatën e Magjistraturës së Northampton, ku u deklarua fajtor dhe u la në paraburgim.

Të hënën, më 9 shtator, Gjykata e Kurorës së Northampton e dënoi Cilin me 24 muaj burg, duke e urdhëruar gjithashtu të paguajë një shtesë prej 187 £ pas lirimit të tij. Gjykata vendosi gjithashtu për konfiskimin dhe asgjësimin e drogës dhe pajisjeve që ai përdorte për kultivim.