Deputetët e Partisë Demokratike rikthyen kaosin në Kuvend gjatë seancës plenare, duke shfaqur akte të protestës ndaj vendimit për heqjen e mandatit të deputetit Ervin Salianji. Gjatë hapjes së seancës nga kryetarja e Kuvendit, Elisa Spiropali, deputetët demokratë u mblodhën rreth foltores, ndërsa pjesa ku ulen ministrat u rrethua nga punonjësit e Gardës së Republikës.

Teksa Spiropali lexonte vendimin për heqjen e mandatit të Salianjit, situata u tensionua kur deputeti dhe kryetari i Grupit Parlamentar të PD, Gazment Bardhi, hodhi këmbën e një karrigeje, e cila përfundoi pranë kryetares së Kuvendit. Një punonjës i Gardës ndërhyri për të ndihmuar Spiropalin në atë moment të tensionuar.

Pas kësaj, deputetët e opozitës nxorën jashtë karriget e tyre dhe iu vunë flakën si shenjë simbolike proteste. Gazment Bardhi deklaroi se ata janë në Kuvend jo për karriget e tyre, por për të mbrojtur interesin publik. Ai shtoi se, pavarësisht protestës, deputetët demokratë nuk do të djegin mandatet dhe nuk do të shmangen nga beteja e tyre politike.

Më vonë, situata u përshkallëzua më tej kur deputeti Flamur Noka pati një përplasje fizike me deputetin Petro Koço, duke e shtyrë atë në një moment tensioni. Kjo përplasje detyroi kryetaren e Kuvendit, Elisa Spiropali, të përjashtonte Nokën nga seanca.