Ish-kryedemokrati Lulzim Basha ka marrë pjesë në mbledhjen e Grupit Parlamentar të Partisë Popullore Europiane në Këshillin e Europës. Në një postim në Facebook, ai ka diskutuar çështje të rëndësishme lidhur me gjendjen e shtetit të së drejtës në Shqipëri, e cila sipas tij është një bazament thelbësor për demokracinë dhe zhvillimin e vendit.
Basha theksoi disa raste konkrete që, sipas tij, tregojnë mos-respektimin e gjykatave dhe probleme të tjera sistematike. Ai solli si shembull situatën e Gjykatës Kushtetuese lidhur me mandatin e deputetes Olta Xhaçka dhe arrestimin e deputetit të opozitës, Ervin Salianji, i cili akuzohet për kallëzim të rremë. Në këtë kontekst, Basha theksoi se vëllai i ish-ministrit Xhafaj kishte rezultuar i dënuar, ndërsa vetë ministri ishte subjekt i ligjit anti-mafia.
Ish-kryedemokrati bëri thirrje që këto çështje të merreshin parasysh nga Komisioni i Venecias dhe Këshilli i Europës, me qëllim përforcimin e përpjekjeve për të adresuar sfidat me të cilat përballet shteti i së drejtës dhe sundimi i ligjit në Shqipëri.
Postimi i plotë i Bashës:
“Një nder të jem pjesë e mbledhjes së Grupit Parlamentar të Partisë Popullore Europiane, në Këshillin e Europës. Seanca me Sekretaren e Komisionit të Venecias më dha mundësinë të shtroja për diskutim disa çështje të rëndësishme mbi gjendjen e shtetit të së drejtës në Shqipëri, si bazament i demokracisë dhe zhvillimit të vendit.
Nevoja për të çuar përpara vettingun në politikë, i bllokuar nga mazhoranca por i mbështetur në parim nga Komisioni i Venecias; kriza kushtetuese e nxitur nga mos-respektimi i vendimeve të Gjykatës Kushtetuese për mandatin e deputetes Xhaçka, si dhe arrestimi i deputetit të opozitës Ervin Salianji me akuzën e kallëzimit të rremë, ndërkohë që vëllai i ish-ministrit Xhafaj rezultoi të ishte i dënuar dhe vetë ministri subjekt i ligjit anti-mafia, janë çështje që meritojnë vëmendjen e Komisionit të Venecias dhe Këshillit të Europës, për forcuar përpjekjet e përbashkëta në lidhje me sfidat me të cilat përballen shteti i së drejtës, sundimi i ligjit dhe demokracia funksionale në Shqipëri.”
