Një person i shumëkërkuar nga autoritetet shqiptare është arrestuar mbrëmjen e djeshme nga policia greke në lagjen “Menidi” të Athinës. Ngjarja ndodhi kur skuadra “DIAS” e policisë greke, gjatë patrullimit me këmbë, vuri re dy persona të dyshuar pranë një parku në kryqëzimin e rrugëve “Mposda” dhe “Varela”.

Kur policia i kërkoi të ndaloheshin, dy të dyshuarit nuk i dhanë rëndësi thirrjes, por hodhën disa qese në tokë dhe u larguan me vrap. Gjatë ndjekjes, vetëm njëri nga ta u kap dhe u shoqërua në komisariat.

Gjatë kontrollit të qeseve, brenda tyre u gjetën dhe u sekuestruan dy granata të llojit F1, dy mekanizma ndezës, si dhe një kuti me 49 fishekë të kalibrit 9 mm. Po ashtu, janë gjetur dhe sekuestruar një fishek i kalibrit 0.38 mm dhe tetë fishekë të kalibrit 7.62X25 mm, të cilat i dyshuari i hodhi gjatë arratisjes deri në vendin ku u arrestua.

Ky incident ka ngritur shqetësime për sigurinë publike dhe aktivitetin e grupeve kriminale në zonë, ndërsa autoritetet shqiptare janë informuar mbi arrestimin e personit të shumëkërkuar. Hetimet vazhdojnë për të zbardhur më tej rrethanat e këtij rasti dhe për të identifikuar bashkëpunëtorët e mundshëm.