Gjykata e Vlorës la në “arrest me burg” Skerdian Gabranin, i cili u vetëdorëzua tre ditë më parë në Drejtorinë e Policisë si një nga autorët e dyshuar në vrasjen e Tauland Gjikajt.
Skerdian Gabrani, akuzohet se është bashkëpunëtor për vrasjen e Tauland Beqirajt. Vrasja ndodhi më 3 mars, në lagjen “Bashkimi”, në afërsi të Gjykatës së Apelit Vlorë.
Gabrani ishte në kërkim për krimin e ndodhur më shumë se dy muaj më parë.
Siç u raportua dhe në atë kohë, autori i krimit zbriti nga një makinë me xhama të zinj dhe qëlloi në drejtim të 31-vjeçarit me breshëri kallashnikovi.
Gjikaj u qëllua teksa po ecte në trotuar, ku breshërisë së plumbave u shpëtuan për mrekulli disa kalimtarë. Viktima ka mbajtur më herët dy mbiemra, Beqiraj dhe Manaj, dhe njihej si një person me precedentë të mëparshëm penalë për “Armëmbajtje pa leje” dhe “Vrasje e mbetur në tentativë”. Lidhur me vrasjen e Tauland Gjikajt, Policia arrestoi një nga autorët e dyshuar, Hans (Andi) Jonuzaj.
Ky i fundit u arrestua në automjetin e përdorur në krim, brenda të cilit u gjet edhe arma e krimit tip “Kallashnikov”. Po ashtu, fill pas vrasjes, blutë e Vlorës identifikuan edhe bashkëpunëtorët e 44-vjeçarit në krim, të cilët janë shtetasit Elton Hajnaj dhe Skerdian Gabriani, i cili u vetëdorëzua në Polici.
