Në vijim të hetimeve për aksidentin tragjik të ndodhur dje në aksin rrugor “Korçë-Pogradec”, ku u gjet i pajetë shtetasi Florant Palla, 40 vjeç, grupi hetimor ka arritur të identifikojë dhe lokalizojë drejtuesin e automjetit që u largua nga vendi i ngjarjes. Drejtuesi i automjetit, Gentjan Capo, 38 vjeç, banues në fshatin Gështenjas, është shoqëruar në Komisariatin e Policisë për të dhënë dëshminë e tij.

Capo përballet me akuzat për “Shkelje të rregullave të qarkullimit rrugor” dhe “Largim nga vendi i aksidentit”. Automjeti i tij, i tipit “Volkswagen”, është sekuestruar nga autoritetet si provë materiale, dhe do t’i nënshtrohet analizave për të përcaktuar rrethanat e plota të aksidentit.

Pas një pune intensive hetimore, e cila përfshiu shqyrtimin e kamerave të sigurisë në aksin rrugor “Korçë-Pogradec”, si dhe përdorimin e dronëve dhe dylbive për kontrollin e territorit, automjeti u lokalizua rreth orës 16:40. Policia e arrestoi drejtuesin e automjetit dhe materialet procedurale i janë dorëzuar Prokurorisë për veprime të mëtejshme.