Përmbytjet e rënda që kanë pushtuar Vlorën duket se kanë si shkak kryesor mospastrimin e kanaleve të ujërave të larta. Këto kanale, të mbushura me mbeturina dhe prurje të shumta nga shirat e fundit, dolën nga shtrati dhe vërshuan në disa lagje, duke dëmtuar banesa dhe objekte.

Lagjja më e prekur është “Karabash”, ku kalon një nga kanalet kryesore të qytetit. Banorët e kësaj zone fajësojnë autoritetet për neglizhencë, duke theksuar se kanali nuk është pastruar prej vitesh. Një prej banorëve u shpreh: “Kanali u pastrua për herë të fundit para 6 vitesh, ndërsa më parë, rreth 15 vite më parë, e kishin pastruar në mënyrë më të plotë. Kemi kohë që kërkojmë pastrimin e tij, por askush nuk na ka dëgjuar. Shirat u përplasën dhe u bllokuan, duke shkaktuar përmbytjet.”

Banorët theksojnë se kanali është kyç për mbledhjen e ujërave nga pjesa e pasme e spitalit dhe se në të kaluarën aty ka ekzistuar një liqen, por ndryshimet urbanistike e kanë bërë zonën më të prirur ndaj përmbytjeve. Ata kërkojnë ndërhyrje të menjëhershme për pastrimin e kanalit dhe për të shmangur përsëritjen e situatave të tilla në të ardhmen. Autoritetet vendore pritet të bëjnë verifikime për të përcaktuar përgjegjësit për këtë situatë të pa precedent në qytet.