Ministri i Brendshëm, Ervin Hoxha, dhe drejtori i Përgjithshëm i Policisë së Shtetit, Ilir Proda, janë nisur drejt spitalit të Traumës për të vizituar dhjetë efektivët e policisë të plagosur gjatë protestës së opozitës. Protestuesit përdorën bomba molotov dhe mjete piroteknike, duke shkaktuar plagosje te punonjësit e policisë, ndërsa tensionet mbizotëruan për disa orë në Tiranë.

Policia njoftoi se është duke ndërmarrë të gjitha masat për të identifikuar dhe kapur individët e përfshirë në sulmet mbi policinë dhe institucionet shtetërore. Protesta e opozitës, e organizuar si pjesë e thirrjeve për mosbindje civile, përfundoi pas rreth tre orësh. Protestuesit u mblodhën fillimisht para Kryeministrisë dhe më pas protestuan para Ministrisë së Brendshme, Bashkisë së Tiranës, selisë së PS-së dhe Kuvendit, ku u shpërndanë nga policia me gaz lotsjellës.

Në njoftimin e saj, Policia e Shtetit deklaroi se është e angazhuar maksimalisht për mbrojtjen e institucioneve shtetërore, pronës publike dhe private, si dhe jetës së qytetarëve dhe të punonjësve të policisë. Ajo bëri thirrje që sulmet me molotov dhe lëndë piroteknike të ndalen dhe njoftoi se janë marrë masat për identifikimin e të përfshirëve në këto sulme.