Lulzim Basha ka reaguar pas dorëheqjes së deputetit socialist Jurgis Çyrbja, i cili dha dorëheqjen pasi u paraqit në SPAK. Çyrbja deklaroi se dorëzimi i mandatit lidhet me arsye shëndetësore, por Basha në një postim në Facebook, ka akuzuar kryeministrin Edi Rama për krijimin e një klime korrupsioni dhe mbrojtjen e abuzuesve në qeveri.

Sipas Bashës, largimi i deputetëve dhe ministrave nga funksionet e tyre kur përballen me drejtësinë nuk është një zgjidhje për përgjegjësitë e kryeministrit. Ai thekson se Rama ka qenë i vetëdijshëm për abuzimet dhe krimet e krerëve të hipotekave, duke i shpërblyer ata për shërbimet që i kanë kryer në mënyrë të korruptuar.

“Edi Rama nuk mund të lajë duart vetëm duke detyruar deputetë e ministra të largohen nga funksionet kur u tunden prangat. Ai duhet të mbajë përgjegjësi pse e ka zhytur vendin në korrupsion dhe ka veshur krimin me pushtet. E ka ditur mirë se kush kanë qenë krerët e hipotekave, sa hajdutë dhe abuzues janë. Ai vetë i ka caktuar, i ka mbrojtur dhe i ka shpërblyer kur i kanë kryer pazaret e tij si duhet,” shkruan Basha.

Ai gjithashtu përmend se Çyrbja, gjatë kohës kur drejtonte Hipotekën e Durrësit, i shërbeu të dënuarit Emiljano Shullazi dhe më pas, sipas Bashës, vazhdoi t’i shërbejë edhe në gjyq, çka e bëri Ramën ta promovojë si deputet.

“Siç bëri me Çyrbjen e Hipotekës së Durrësit, i cili pasi i shërbeu Shullazit në zyrë, i shërbeu deri në fund edhe në gjyq. Për këtë Rama vendosi ta bëjë deputet, si përfaqësuesin e bandave të Shijakut dhe Durrësit në parlament,” vijon Basha, duke përmbyllur me pohimin se Shqipëria meriton më shumë.

Ky reagim vjen në kontekstin e tensionuar politik që shoqëron dorëheqjen e Çyrbjes dhe përfshirjen e tij në hetimet për korrupsion dhe abuzim të detyrës.