Policia e Tiranës ka zbuluar një magazinë ku kultivohej kanabis në zonën e Selitës, duke arrestuar 6 persona të dyshuar për përfshirje në aktivitetin e paligjshëm. Në magazinë u gjetën 105 bimë kanabis, të kultivuara në vazo plastike, si dhe pajisje të nevojshme për rritjen e tyre në ambiente të mbyllura.

Sipas burimeve, personat që merreshin me këtë aktivitet kishin përdorur një hyrje nga pjesa e pasme e ndërtesës, për të mos tërhequr vëmendjen e pronarëve të katit të parë, ku ndodhet Agjencia Shtetërore e Kadastrës (ASHK). Kjo strukturë e përdorur nga autorët ishte e privatizuar dhe në pronësi të tre personave.

Zbulimi u bë nga ish-deputeti Halit Valteri, i cili aktualisht punon në ASHK. Gjatë një inspektimi në një nga magazinat e agjencisë, Valteri vuri re disa objekte të dyshimta në katin e dytë dhe menjëherë njoftoi ministrin e Brendshëm, Ervin Hoxha. Pas ndërhyrjes së agjentëve të Komisariatit numër 2, policia zbuloi aktivitetin e paligjshëm të kultivimit të kanabisit.

Në hetimet e mëtejshme janë përfshirë edhe strukturat e Agjencisë së Mbikëqyrjes Policore, për të verifikuar nëse efektivë të policisë ishin në dijeni të këtij aktiviteti. Gjithashtu, po hetohet mundësia e shpërdorimit të energjisë elektrike dhe përfshirja e punonjësve të OSSHE në këtë veprimtari të paligjshme.

Policia pritet të lëshojë urdhër-arreste për të ndriçuar më tej rrethanat e këtij rasti dhe rolet e të përfshirëve.