Policia e Tiranës ka referuar në prokurori për hetim në gjendje të lirë aktivisten Adriana Kalaja, pas protestës që u zhvillua një ditë më parë para Bashkisë, ku u dogjën goma automjetesh. Ajo akuzohet për veprat penale “Prishja e rendit dhe qetësisë publike”, “Ndotja e ajrit, e ujërave dhe e tokës” dhe “Organizimi dhe pjesëmarrja në grumbullime e manifestime të paligjshme”.
Në kuadër të hetimeve, janë kërkuar hetime edhe për pesë persona të tjerë: Klodijan Bajrami, Klevis Balliu, Ilir Tusha, Astrit Hysa dhe Sokol Ndoja. Këta individë përballen me akuzat për “Kundërshtimin e punonjësit të Policisë së Rendit Publik” dhe “Organizimin dhe pjesëmarrjen në grumbullime e manifestime të paligjshme”. Sipas policisë, këta shtetas kanë djegur dy goma automjetesh gjatë protestës dhe më pas janë bashkuar me grupin e deputetëve, duke kundërshtuar punonjësit e Policisë.
Njoftimi i Policisë:
Drejtoria Vendore e Policisë Tiranë, në lidhje me tubimin e zhvilluar ditën e djeshme, njofton se, në vijim të veprimeve hetimore, ka referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë për:
– Adriana Kalaja, 60 vjeçare, për veprat penale “Prishja e rendit dhe qetësisë publike”, “Ndotja e ajrit, e ujërave dhe e tokës” dhe “Organizimi dhe pjesëmarrja në grumbullime e manifestime të paligjshme”.
– Klodijan Bajrami, 22 vjeç, Klevis Balliu 35 vjeç, Ilir Tusha, 49 vjeç, Astrit Hysa, 45 vjeç, dhe Sokol Ndoja, 38 vjeç, për veprat penale “Kundërshtimi i punonjësit të Policisë së Rendit Publik” dhe “Organizimi dhe pjesëmarrja në grumbullime e manifestime të paligjshme”.
Materialet do t’i kalojnë Prokurorisë për procedimin e mëtejshëm të çështjes.
