Dega Manhattan e Vatrës ka bërë thirrje për një protestë të fuqishme më 26 tetor në orën 11:00 në Nju Jork, për të pritur takimin e kryeministrit Edi Rama dhe ministrit të tij për Diasporën, Taulant Balla. Kjo protestë është quajtur nga organizatorët si një takim me patronazhistët.

Në thirrjen e tyre publike, Dega Manhattan e Vatrës fton të gjithë shqiptaro-amerikanët në Nju Jork dhe jashtë saj që të bashkohen në këtë protestë kundër atyre që, sipas tyre, kanë kontribuar në shpopullimin e Shqipërisë.

“Ne nuk mund të bëjmë asnjë hap pas. Është diaspora ajo që do ta udhëheqë këtë betejë për të mbrojtur të ardhmen e vendit tonë dhe për të ndaluar ikjen masive të shqiptarëve,” thuhet në njoftim.

Mesazhi i Vatrës shprehet kështu: “Të dashur bashkatdhetarë, Dega Manhattan e Vatrës ju fton të bashkohemi në një protestë të fuqishme kundër atyre që kanë kontribuar në shpopullimin e Shqipërisë sonë të dashur. Koha për të ngritur zërin është tani. Bashkohuni me ne. Bashkë jemi më të fortë.”