Ish-presidenti Ilir Meta dhe deputetja Monika Kryemadhi po përballen me akuza të rënda nga SPAK (Prokuroria e Posaçme Kundër Korrupsionit dhe Krimit të Organizuar) për fshehje të pasurisë dhe për transaksione të paligjshme financiare. Sipas dosjes hetimore, Meta dhe Kryemadhi nuk kanë deklaruar një sërë të ardhurash dhe transaksionesh të mëdha financiare gjatë viteve 2007-2009.
Në vitin 2008, Monika Kryemadhi ka tërhequr nga overdrafti i llogarisë 50.000 Euro dhe më pas ka bërë depozita cash në llogari të ndryshme, përfshirë 10.000 Euro dhe 41.000 Euro, por nuk dihet origjina e këtyre parave. Nga verifikimi i llogarive bankare të saj rezulton se një shumë e konsiderueshme parash ka kaluar përmes llogarive pa një burim të qartë të të ardhurave.
Gjithashtu, nga hetimi rezulton se Kryemadhi ka marrë kredi dhe ka bërë tërheqje të mëdha cash, duke krijuar një situatë komplekse financiare. Për më tepër, llogaritë bankare të saj janë kredituar me 1.108.704 Euro nga të cilat janë shpenzuar 1.081.098 Euro për shpenzime të jetesës, shkollimin e fëmijëve dhe udhëtime, duke ngritur dyshime mbi legjitimitetin e këtyre transaksioneve.
Një tjetër element kritik në këtë dosje është se nuk është deklaruar as llogaria bankare e përbashkët që Era Metaj kishte me gjyshen Fatime Kryemadhi, ku ndodhej një shumë prej 100.000 Pound. Kjo llogari nuk është përmendur në asnjërën nga deklaratat e interesave private të çiftit Meta-Kryemadhi për vitet 2019, 2020, 2021 dhe 2022.
SPAK ka gjetur gjithashtu se në vitin 2019 janë bërë blerje të konsiderueshme për veshje dhe produkte luksoze, duke ngritur pyetje mbi burimet financiare për këto shpenzime. Madje, janë identifikuar pagesa për udhëtime dhe akomodime luksoze, që duken të papërballueshme për të ardhurat e deklaruara nga çiftin.
Në përfundim, hetimet e SPAK kanë zbuluar një mozaik të transaksioneve dhe shpenzimeve që çojnë në dyshime të thella për burimet e legjitime të financave të Ilir Metës dhe Monika Kryemadhit, duke hapur një çështje të rëndësishme për integritetin e tyre politik dhe financiar.
