Ish-zv.drejtori i Përgjithshëm i Policisë së Shtetit, Agron Kuliçaj, ka dhënë sqarime për Prokurorinë e Posaçme (SPAK) lidhur me dosjen e 21 janarit. Gjatë një deklarate për mediat pas daljes nga SPAK, Kuliçaj theksoi se i ka shpjeguar prokurorëve të gjitha veprimet e policisë në atë ditë, por nuk mund të jepte më shumë detaje për shkak të sekretit hetimor. “Dhashë shpjegimet e mia në lidhje me 21 janarin. Shpjegova të gjitha veprimet e policisë në ditën e ngjarjes. Nuk mund të flas më tepër për shkak të ruajtjes së sekretit hetimor,” tha ai.
Po ashtu, ditën e djeshme, ish-drejtori i Përgjithshëm i Policisë, Hysni Burgaj, u paraqit në SPAK për të dhënë sqarime lidhur me ngjarjet e 21 janarit. Ai shpjegoi se kishte dhënë informacion si një person që ka dijeni për ato ngjarje. “Plani i masave është 50 faqe, nuk mund ti komentoj. Policia ka bërë një plan të detajuar masash për 21 janarin dhe ka zbatuar ligjin. Kam zbatuar ligjin. Nuk kemi pasur asnjë urdhër për të reaguar. Policia ka duruar dhunë ekstreme dhe nuk ka përdorur as armë dhe as dhunë ndaj protestuesve. Urdhërarrestet janë ekzekutuar,” tha Burgaj për gazetarët pas daljes nga SPAK.
Kujtojmë se në korrik, Prokuroria e Posaçme ka regjistruar procedimin penal për dosjen e 21 janarit, ku gjatë protestës së asaj kohe u vranë katër qytetarë të pafajshëm. Procedimi ka nisur për vrasjen e Aleks Nikës, si dhe plagosjen e shtetasve Artes Dybeli, Ilia Qesko dhe Ilia Papa.
