Deputetja e Partisë Demokratike, Jorida Tabaku, reagoi ashpër ndaj fushatës së qeverisë për pensionistët, duke e quajtur atë një “show të radhës” të realizuar për përfitime politike. Në një postim në rrjetet sociale, Tabaku deklaroi se kjo fushatë është një cirk i manipuluar, ku qeveria përdor 780,000 pensionistë për përfitime politike, ndërkohë që realiteti buxhetor tregon një shpërndarje të pabarabartë të fondeve.

Sipas Tabakut, qeveria ka ndarë 73 milionë euro shtesë për kontratat e Partneritetit Publik-Privat (PPP) krahasuar me fillimin e vitit, ndërsa për pensionistët është caktuar një fond minimal, pesë herë më i vogël se shuma e dedikuar për koncesionet.

Reagimi i plotë i Tabakut

“Emocionet e ministreshave dhe deputetëve për pensionistët janë thjesht shou i radhës i një cirku të telekomanduar, ku urdhërohet që 780,000 pensionistë duhet të takohen për të krijuar imazh. Politikanët flasin me vepra, dhe e vërteta është krejt ndryshe. Në shtator 2024, qeveria socialiste ndryshoi buxhetin dhe shtoi 73 milionë euro për PPP-të, ndërkohë që pensionistëve iu dha një fond shumë më i ulët se ai për oligarkët. Qeveria e pakicës vazhdon të privilegjojë një grusht të vogël, ndërsa injoron ata që kanë më shumë nevojë,” theksoi Tabaku në deklaratën e saj.