Komisariati i Policisë Kukës ka finalizuar me sukses operacionin policor të koduar “Reaction,” duke ndërhyrë në kohë për të parandaluar një ngjarje të mundshme kriminale në familje, në fshatin Arrën. Si rezultat i këtij operacioni, u arrestua në flagrancë një 60-vjeçar që ushtronte dhunë ndaj bashkëshortes dhe kërcënonte atë dhe fëmijët me armë zjarri. Policia sekuestroi tre armë zjarri dhe municion luftarak të mbajtur nga 60-vjeçari në banesën e tij.

Shërbimet e Policisë së Komisariatit Kukës, pas marrjes së një njoftimi se një shtetas ushtronte dhunë dhe kërcënonte familjarët e tij me armë, organizuan menjëherë ndërhyrjen për të parandaluar përshkallëzimin e situatës. Falë reagimit të shpejtë dhe profesional të efektivëve, në kuadër të operacionit “Reaction,” u bë arrestimi në flagrancë i shtetasit R. S., 60 vjeç, banues në fshatin Arrën.

Gjatë kontrollit në banesën e të arrestuarit dhe në zonën pranë vendngjarjes, ku ndodhej i dyshuari, policia gjeti dhe sekuestroi dy armë zjarri automatike, një pistoletë dhe një sasi municioni luftarak, të cilat janë sekuestruar si prova materiale. Materialet procedurale janë dorëzuar në Prokurori për veprime të mëtejshme ligjore.