Në një konferencë për shtyp, kreu i Partisë Demokratike, Sali Berisha, bëri thirrje për mobilizim qytetar në protestën e mosbindjes civile të planifikuar për datën 29 tetor. Protesta pritet të bllokojë disa akse kryesore në të gjithë vendin, me qëllim mbrojtjen e interesave dhe lirive themelore të shqiptarëve, të cilat, sipas Berishës, janë duke u minuar nga qeveria e Edi Ramës.

“Po e bëjmë këtë për të mbrojtur interesat jetike të qytetarëve,” u shpreh Berisha, duke nënvizuar se mosbindja civile është një mjet për të ruajtur lirinë dhe dinjitetin e atyre që besojnë në votën e lirë dhe sundimin e ligjit.

Ai theksoi se të dhënat nga Eurostat tregojnë se nga viti 2014 deri në vitin 2023, Shqipëria ka humbur 1.099.734 qytetarë, të cilët janë larguar drejt hapësirës së Shengenit. Berisha përmendi gjithashtu emigrimin e shqiptarëve në SHBA dhe vende të tjera, duke e cilësuar këtë largim masiv si një pasojë të drejtpërdrejtë të regjimit aktual qeveritar.

“I ftoj qytetarët të bashkohen në këtë protestë,” theksoi Berisha, duke e përshkruar protestën si një përpjekje kundër asaj që ai e quan një “regjim antishqiptar” që po cënon të drejtat dhe të ardhmen e vendit.