Një përplasje e rëndë me armë ka ndodhur sot në fshatin Dobraç të Shkodrës, duke shkaktuar tre viktima dhe dy të plagosur. Sipas raportimeve, incidenti ndodhi mes dy automjeteve që po lëviznin, të cilat shkëmbyen të shtëna me breshëri armësh ndërsa ishin në lëvizje.

Një nga automjetet, me targa kroate, u godit disa herë dhe më pas u përplas me një mur. Viktimat ndodheshin brenda një automjeti tip “S class” në momentin e atentatit.

Në vendngjarje ndodhen ambulanca dhe grupi hetimor, ndërsa pritet një njoftim zyrtar nga policia. Një nga të plagosurit, sipas raportimeve, ndodhet në gjendje kritike në spital.

E vdekur mbeti edhe një kalimtar e rastit në ngjarjen e rëndë të ndodhur këtë pasdite në lagjen Dobraç të Shkodrës.