Deputetja e Partisë Demokratike, Jorida Tabaku, përmes një videoje të postuar në rrjetet sociale, theksoi se çështja e pensioneve nuk duhet të trajtohet me partizëm politik, pasi rritja e çmimeve prek të gjithë qytetarët pa dallim politik.

“Çmimet e rritura i paguajnë njësoj si të majtët, ashtu edhe të djathtët. Nuk ka absolutisht asnjë ndryshim. Me 20 lekë në ditë, sot nuk blihet as biletë autobusi, as gjysmë kafeje, jo më të mbulohen nevojat që kanë sot pensionistët, si ilaçet, ushqimet apo produkte të tjera jetike,” deklaroi Tabaku.

Ajo akuzoi qeverinë për shpërdorimin e buxhetit gjatë dekadës së fundit, duke pohuar se janë humbur 8 miliardë euro, të cilat, sipas saj, mund të ishin përdorur për të përmirësuar kushtet e pensionistëve. Tabaku gjithashtu bëri thirrje qytetarëve që të ngrenë pyetje ndaj deputetëve socialistë mbi gjendjen e vështirë të prindërve të tyre, duke kërkuar që të reflektojnë mbi çmimet e papërballueshme për nevojat bazike të të moshuarve.

“Nëse duan, paratë për pensionistët i nxjerrin nga dheu. Ky është problemi: nuk duan dhe nuk i rrisin pensionet!” përfundoi Tabaku. Sipas saj, trajtimi i pensioneve nuk duhet të mbetet një çështje retorike, por kërkon vendime të guximshme dhe vullnet të fortë për të mbështetur realisht të moshuarit me kushte më të mira dhe ndihmë më të fuqishme ekonomike.