Kryetari i Partisë Demokratike – Demokratët Euroatlantikë, Lulzim Basha, ka reaguar sot kundër deklaratave të kryeministrit Edi Rama, duke theksuar se ai po përpiqet të ndajë sipërmarrësit nga qytetarët për të fshehur dështimin e tij në mbështetjen e pensionistëve.

Basha theksoi se qeveria ka dështuar në menaxhimin e skemës së pensioneve dhe vuri në pah se “fondet e destinuara për pensionet po mbahen peng nga investitorë strategjikë dhe projekte të lidhura me korrupsionin,” ndërkohë që pensionistët përballen me çmime të larta për ilaçet dhe vështirësi financiare të përditshme.

Sipas Bashës, kryeministri Rama “sillet si një drejtor azili,” duke fajësuar të tjerët, ndërkohë që “kishte në dorë të gjithë pushtetin për të përmirësuar gjendjen”. Ai theksoi se qeveria po lejon investitorët strategjikë dhe strukturat e saj të përfitojnë nga fonde publike, duke përfshirë hoteleri, kazino, projekte korruptive të Partneriteteve Publiko-Private (PPP) dhe tenderat sekretë. Sipas tij, kjo po pengon përmirësimin e gjendjes së pensionistëve.

Në postimin e tij në Facebook, Basha shpreh mbështetje për pensionistët, duke bërë thirrje për një votë ndëshkuese ndaj qeverisë në zgjedhjet e ardhshme dhe duke deklaruar: “Pensionistët shqiptarë meritojnë më shumë! Çmimet e ilaçeve në Shqipëri janë ndër më të lartat në krahasim me ato të vendeve të Bashkimit Europian, dhe kjo situatë nuk mund të vazhdojë”.